Bureau for Intellectual Property

Un buki, un obra di arte, un investigashon sientífiko tur ta obra kreá pa un outor. Derechi di outor ta duna tur persona ku a krea un obra e derechi pa e so disidí kon su obra lo keda eksplotá. Derechi di outor ta protehá e outor kontra mal uso di su obra dor di otro hende. En parti, danki na e protekshon ku derechi di outor ta duna, hende ta keda kreativo.

Derechi di outor ta enserá dos tipo di derechi. E promé ta derechi di eksplotashon i e otro ta e derechi moral. E derechi di eksplotashon ta e derechi eksklusivo ku e outor tin pa e publiká i multipliká su obra. E derechi eksklusivo di eksplotashon ta pèrmití e outor prohibí, por ehèmpel, reprodukshon di su obra den vários forma manera: tradukshon di su obra na un otro idioma, traha un komedia di e obra òf graba e obra riba un disko kompakto. E derechi moral ta e derechi ku e outor tin pa, entre otro, semper keda menshoná komo kreador di su obra i tambe pa oponé kualke kambio den e obra.

E protekshon ku derechi di outor ta duna ta kuminsá desde e momentu ku e kreador kuminsá krea e obra. E lei ku ta regulá derechi di outor na Kòrsou yama, Auteursverordening 1913, P.B. 1913, no. 3, esta Ordenansa Nashonal di derechi di outor di 1913, P.B. 1913, no. 3. E lei aki ta otorgá na e outor un derechi ku un durashon di te ku 50 aña despues di morto di e outor.

Derechi di outor no ta mará na formalidat di registrashon. E tratado di Bern tokante Protekshon di obranan Literario i Artístiko ta bisa ku e derechi ta nase outomátikamente. E kreador di e obra artístiko òf literario no ta mará na proseduranan formal òf otro tipo di formalidat pa haña e derechi di outor. E kreador ta protehá desde e momentu ku otro hende por tuma nota di su obra. Siendo ku registrashon no ta un rekisito pa bo haña derechi di outor, den kaso di violashon di bo derechi bo mester tin sufisiente prueba ku e obra ta di bo. E pruebanan aki mester tin un fecha kual ta e fecha di kreashon di e obra. Ofisina pa Propiedat Intelektual a introdusí e i-Envelope ku tambe por yuda bo den e kaso aki. E i-Envelope ta un medio ku kual bo por proba bo fecha di kreashon.

Den kaso di violashon di derechi di outor, e Ordenansa Nashonal di Derechi di Outor di 1913 ta duna e posibilidat na e outor pa sea e persiguí e violadó pa medio di un prosedura penal òf un prosedura sivil. Den kaso di un persekushon penal e violadó por paga un but òf e por haña un kastigu di prison. Den kaso di un prosedura sivil e violadó lo tin ku paga daño di perhuisio.  

Riba dia 26 di mart di aña 1995 e asosiashon “Corpus Mysticum” a keda fundá. Esaki ta un asosiashon pa derechinan di outor. Den kaso di un disputa un outor, ku ta miembro di e asosiashon, por pidi Corpus Mysticum informashon, konseho i asistensia pa media den un kaso di violashon di derechi di outor. Tin un koperashon estrecho entre OPI i Corpus Mysticum riba e materia di derechi di outor. E dos organisashonnan aki ta traha huntu i vários biaha a organisá seminarionan riba diferente tópiko manera derechi di outor, pirateria, derechi di outor i fotógrafo.