F.A.Q.

1. Kiko ta derechi di outor?
Esei ta e derechi eksklusivo di e kreador di un obra literario, sientífiko òf artístiko pa publiká i multipliká su obra. 

2. Mi mester registrá mi obra pa e ta protehá?
No. OPI no ta ofresé registrashon di derechi di outor. Derechi di outor no ta mará na prosedura di registrashon. Ta konsiderá ku un obra ta protehá pa derechi di outor for di e momentu ku e ta eksistí. Esaki ta segun e Konvenshon di Berna. Konvenshon di Berna ta un tratado internashonal ku ta regla protekshon di obranan literario i artístiko. Kòrsou ta parti di e tratado aki. Esaki ta nifiká ku obranan literario i artístiko ta protehá sin ta dependé di formalidat di registrashon.
Mester tene kuenta si ku tin vários pais ku ta ofresé registrashon di obra ku e meta pa, por ehèmpel, identifiká i distinguí título di obranan. Pero nos no ta hasi esei.

3. Si derechi di outor no ta mará na registrashon, kon mi por proba ku ami ta e outor?
Ta rekomendabel pa outornan pone un fecha riba nan obra. Den kaso di kuadro i pintura ta ménos difísil. Riba e obra mes bo ta mira ken ta e kreador. Pero den kaso di, por ehèmpel, un komposishon musikal e ta mas difísil. Ta pa e motibu ei ta importante pa pone fecha riba kada un pida diseño provishonal di e obra.
Banda di esaki OPI ta ofresé e servisio di i-Envelope komo un solushon. E outor por usa e i-Envelope pa obranan ku ainda no ta konosí pa públiko. E i-Envelope ta un bon medio pa sigurá e fecha di kreashon di un obra.

4. ISBN ta un forma di registrashon di derechi di outor? 
No. ISBN ta un sistema internashonal di number pa katalogá buki. Ku e number aki bukinan por keda distinguí un for di otro. Un number di ISBN no ta duna protekshon di derechi di outor. E derechi aki bo tin’é kaba for di e momentu ku bo a krea bo obra.

5. E obra mester ta kla pa mi haña derechi di outor?  
No. E derechi di outor bo ta hañ’é outomátikamente desde e momentu ku bo a kuminsá krea bo obra. E obra no mester ta tèrminá pa bo haña e derechi.