General

Protekshon di propiedat intelektual a bira é manera pa stimulá desaroyo ekonómiko di paisnan.

Sistemanan di protekshon di propiedat intelektual a sòru na protehá e persona(nan) ku danki na su esfuerso a krea obranan i prestashonnan. E echo ku e kreadó a ser protehá, esei a sirbi komo un estímulo pa e i otronan sigui krea mas i asina kontribuí na desaroyo di nan pais.   

Propiedat Intelektual ta ofresé protekshon na kreashonnan di e mente humano. E kreashonnan aki a ser repartí den diferente área. Por ehèmpel obranan literario, artístiko of sientífiko, señalnan di distinshon i inventonan. Konsekuentemente e áreanan di derechi di propiedat intelektual ta konsistí di entre otro derechi di outor, pa protehá obranan literario, artístiko of sientífiko, derechi di marka pa protehá señalnan di distinshon pa produkto i servisio i derechi di patènt pa protehá inventonan.

Propiedat intelektual ta ser repartí den dos kategoria ku ta Propiedat Industrial i Derechi di Outor.

Bou di Propiedat Industrial ta kai entre otro Derechi di Patènt, Derechi di Marka, Derechi di Modèl Industrial i Indikashonnan di Orígen Geográfiko.

Banda di Derechi di Outor, Propiedat Intelektual ta konsistí tambe di Derechinan Bisiña kua nan ta protehá entre otro e prestashon i presentashon di artistanan, e produktor di obranan diskográfiko i di e produktornan di pelíkula i programanan radial.  

Protekshon di Propiedat Intelektual ta nesesario paso e ta stimulá ekonomia, e ta ofresé e konsumidó informashon tokante e orígen di e produkto ku e a atkerí i e ta stipulá regla ku ta ordená e fluho di produkshon masivo.