Notisia i Publikashonnan

Aniversario di patènt riba bòlpòint

Dies di yüni ta aniversario di e patènt riba bòlpòint pa kua a entregá un solisitut na Argentina na aña 1943, miéntras e invenshon ta korespondé na e rumannan Lászlo i George Biro ta data for di 1938. Ta konsiderá László, un periodista húngaro (29 di sèptèmber 1899 – 24 di novèmber 1985) komo inventor di bòlpòint moderno.

Bíró a nanse na Budapest, Hungria na aña 1899. Na 1938, trahando komo periodista, el a ripará ku e enk ku e tabata usa pa imprimí korant tabata seka lihé i tabata laga e papel seku i sin mancha. El a purba usa mesun enk den un vùlpèn, pero el a ripará ku e enk no ker a bai den e punta pa motibu ku e enk tabata muchu diki. El a traha huntu ku su ruman hòmber George, un kímiko, i a desaroyá un punta nobo ku tabata konsistí di un bala lòs ku ta drei den un buraku i asina, tanten e ta lora, ta saka enk for di un kartucha, lagando e enk atras riba e papel. Bíró a patentá e invento na Paris na aña 1938, despues ku el a hui pa e leinan anti-hudiu na Hungria.

Sin sá

“Vários kompania ta traha ku “software” ilegal, sin ku nan sa esaki. Sigur na momentu di fushon entre kompanianan, kresementu lihé di e kompania, òf ora un kompania ta kumpra un otro, nan ta pèrdè bista riba e “software” ku ta usa i tambe e lisensianan. Loke tambe sa pasa frekuentemente ta ku trahadónan mes ta instalá “software” riba nan kòmpiuter di trabou, sin ku gerensia ta na altura di esaki. Siendo ku gerensia ta keda responsabel pa e software ilegal usá den su kompania, ta importante pa gerensia sòru pa un bon maneho di software i lisensia.”  
Publiká pa Computable, 13 di mart 2008