Notisia i Publikashonnan

Aniversario di patènt riba bòlpòint

Dies di yüni ta aniversario di e patènt riba bòlpòint pa kua a entregá un solisitut na Argentina na aña 1943, miéntras e invenshon ta korespondé na e rumannan Lászlo i George Biro ta data for di 1938. Ta konsiderá László, un periodista húngaro (29 di sèptèmber 1899 – 24 di novèmber 1985) komo inventor di bòlpòint moderno.

Bíró a nanse na Budapest, Hungria na aña 1899. Na 1938, trahando komo periodista, el a ripará ku e enk ku e tabata usa pa imprimí korant tabata seka lihé i tabata laga e papel seku i sin mancha. El a purba usa mesun enk den un vùlpèn, pero el a ripará ku e enk no ker a bai den e punta pa motibu ku e enk tabata muchu diki. El a traha huntu ku su ruman hòmber George, un kímiko, i a desaroyá un punta nobo ku tabata konsistí di un bala lòs ku ta drei den un buraku i asina, tanten e ta lora, ta saka enk for di un kartucha, lagando e enk atras riba e papel. Bíró a patentá e invento na Paris na aña 1938, despues ku el a hui pa e leinan anti-hudiu na Hungria.

Na aña 1943 e rumannan a muda bai Argentina i dia dies di yüni a bolbe entregá un solisitut pa patènt, i a forma Biro Pens di Argentina (echo ta ku na Argentina nan konosé bòlpòint komo “birome”). E británikonan a tuma un lisensia i tabata produsí bòlpòint pa tripulashonnan di Royal Air Force. Den e uso di e diseño nobo aki, nan a konstatá ku na gran altura e bòlpòintnan tabata traha muchu mas mihó ku vùlpèn.

Na 1950 Marcel Bich a kumpra e patènt riba e pèn di Bíró, ku pronto a bira e produkto prinsipal di su Bic Company.
László Bíró a fayesé na Buenos Aires na aña 1985. Na Argentina ta selebrá Dia di Inventor riba dia di Bíró su kumpleaños, 29 di sèptèmber.
Fuente: The free encyclopedia, http://en.wikipedia.org