Marka

Registrashon Internashonal di Marka

REGISTRASHON INTERNASHONAL DI MARKA
Awor posibel for di Kòrsou

Introdukshon

Kòrsou, favorablemente situá den hemisferio oksidental, ku su lasonan históriko i konstitushonal ku Reino Hulandes, awendia ta okupá un posishon stratégiko pa loke ta derecho di propiedat intelektual. Grasias na Protokòl di Madrid bo tin un medio pa registrá bo marka na vários otro pais, loke sigur ta un manera interesante pa protehá bo mes for di Kòrsou kontra violashon di derecho di marka den un parti grandi di mundu.

Historia

Pa motibu di eksistensia di Akuerdo di Madrid (for di 1892) protekshon internashonal di marka ta posibel. Sin embargo, hopi tempu protekshon internashonal di marka tabata nifiká ku ken ku tabata deseá protekshon di su marka na diferente pais, tabata entregá un solisitut den kada unu di e paisnan kaminda e tabata deseá protekshon. E gastunan pa entrega di un petishon nashonal ta varia konsiderablemente di pais pa pais. Esei a pone ku rònt mundu gastunan pa optené registrashon a subi bárbaramente te hopi shen mil florin. Komo konsekuensia di e tipo di gastunan aki registrashon internashonal di marka a bira algu impagabel pa empresanan chikí i mediano, i empresanan grandi tabata pensa dos biaha promé nan solisitá pa registrashon internashonal di marka.

Na 1989 a aprobá e Protokòl relashoná ku Akuerdo di Madrid, a deklar’é na vigor dia promé di desèmber 1995 i el a bira efektivo dia promé di aprel 1966. E tratado aki a bira mas konosí ku su predesesornan i na e momento aki tin 84 pais ku ta miembro di dje, inkluso Estádos Unidos di Amérika, Singapore, Hapon, China i mayoria di e paisnan di Union Oropeo i otro paisnan oropeo manera Turkia, Kroasia i Bulgaria.

Derecho di marka ta mará na nan hurisdikshon. Registrashon den bo propio hurisdikshon no ta duna bo protekshon kontra violashon den un otro hurisdikshon. P’esei mayoria di doño di marka ta opta pa registrá nan marka den hurisdikshonnan ku ta di importansia pa nan, segun nan strategia di negoshi.

Dia promé di yanüari 2001 Antia Hulandes a aprobá un Ordenansa Nashonal di Marka nobo. A base di e ordenansa nashonal aki, ku ta mas adaptá na eksigensianan pa protekshon di marka den e tempu aki, nos pais por a bira miembro di e sistema di Madrid.
E sistema di Madrid pa registrashon internashonal di marka ta kai bou di dos tratado, e Akuerdo di Madrid i e Protokòl di Madrid, i ta bou di maneho di Ofisina Internashonal di Organisashon Mundial pa Propiedat Intelektual (WIPO) na Ginebra, Suisa. Dia 28 di aprel 2003 e Protokòl di Madrid a drenta na vigor pa loke ta Antia Hulandes. Esei a hasi registrashon internashonal di marka via Antia Hulandes posibel.  For di 10 di òktober 2010, un persona aplikando i registrando via e sistema di Madrid Protokòl mester apliká separá pa Kòrsou.

E gastunan pa doñonan di marka antiano ku ke haña registrashon internashonal a baha drástikamente, pa un gran parti grasias na e echo ku Kòrsou a bira miembro di Protokòl di Madrid.

Protekshon legal

Protokòl di Madrid ta basá riba e eksigensia di un registrashon básiko nashonal òf regional òf solisitut pa registrashon na ofisina di un parti kontraktante. E ofisina di e parti kontraktante yama Ofisina di orígen i e parti kontraktante en kuestion yama pais di orígen. Na Ofisina pa Propiedat Intelektual di Kòrsou por haña un registrashon nashonal dentro di 14 dia di trabou; e término aki ta mas kòrtiku ku na mayoria di otro pais.

Promé ku entregá un solisitut internashonal e potensial solisitante mester krea un base legal ku e estado ku e ke usa komo pais di orígen. Konforme Protokòl di Madrid, artíkulo 2, párafo 1, e solisitante mester ta siudadano di e estado kontraktante ku e ta usa komo pais di orígen, òf e mester ta domisiliá na, òf mester tin un establesimentu industrial òf komersial konkreto i aktivo na e estado kontraktante menshoná.

E echo di ta siudadano di, òf domisiliá na, un pais ku no ta Kòrsou no nesesariamente mester ta un motibu pa keda ekskluí for di uso di e sistema magnífiko aki. Bo tin posibilidat di establesé un kompania aki na Kòrsou i traspasá bo derechonan di propiedat intelektual na e kompania aki i laga e kompania aki manehá bo derechonan di propiedat intelektual. Na Kòrsou
nos tin vários kompania di trust ku eksperensia den maneho di eksplotashon di derecho di propiedat intelektual. Komo konsekuensia di e echo ku nan ta establesé den un hurisdikshon stratégiko, kompanianan di trust ta partner valioso pa protekshon legal, planiamentu di impuesto, eksplotashon finansiero i maneho efektivo di aktivonan stratégiko di bo empresa.

Despues di entrega di un registrashon internashonal no ta dura mas ku 12 luna, den kaso eksepshonal 18 luna, pa bo tin protekshon internashonal na e paisnan ku abo a indiká. E ventahanan di e Protokòl di Madrid ta e siguientenan:

•  un solo solisitut 
•  na un idioma 
•  entregá na Ofisina di Registrashon na bo propio pais
•  resultando den protekshon na vários pais

Den e fase despues di registrashon e ventahanan ta:

• posibilidat pa, despues di registrashon, ekstendé e protekshon te na otro pais
• un solo solisitut pa kambio (traspaso, kambio di nòmber i/òf adrès etc.) ku por ta elashonáku e registrashon den su totalidat òf parsialmente
• un solo solisitut pa renobashon

Si bo ke tin probecho di e ventahanan di Protokòl di Madrid, ata algun di e pasonan ku bo mester tuma!

 1.  Nos ta rekomendá lantamentu di un kompania antiano ku lo ta doño di e
      derechonan di marka;
 2.  Mester registrá e marka na Ofisina pa Propiedat Intelektual di 
       Kòrsou.
      Tarifa básiko pa e registrashon ei ta aproksimadamente NAFl. 750,00;
 3.  Laga e kompania ku bo a kaba di lanta na Kòrsou hasi e 
      registrashon internashonal pa bo pa medio di Ofisina pa Propiedat
      Intelektual di Kòrsou.

Bo registrashon internashonal ta karga fecha di e solisitut pa registrashon básiko na Kòrsou, kontal ku risibí e solisitut na Ofisina Internashonal na Ginebra dentro di 2 luna despues di e fecha di registrashon na Kòrsou.

Periodo di valides di un registrashon internashonal ta dies aña i por renob’é pa periodonan adishonal di dies aña, simplemente pagando Ofisina Internashonal e gastu rekerí.