Marka

Registrashon di marka na Kòrsou

Marka ta sirbi pa distinguí produkto i servisio for di otro. No solamente produktonan di diferente produktornan sino tambe produktonan di e mesun produktor.
E lei di marka tin un ophetivo dòbel. E ta protehá e interes di e doño di e marka. E doño di e marka ku a depositá su marka tin e derechi apsoluto pa uso di su marka. Otronan no por hasi uso di e marka sin su outorisashon i asina gosa di e bon reputashon ku e marka a gana dor di entre otro e invershonnan grandi ku e doño di marka a hasi. Di otro banda e ta protehá e interes di e konsumidó dor di prevení ku esaki ta keda konfundí dor di mal interpretashon.

E lei di Marka.
Na Kòrsou e lei di marka ta regla den e Ordenansa Nashonal di Marka di 1995 (P.B. 1996, no. 188) I den e Dekreto Nashonal di Marka (P.B. 2000, no. 147). Un kondishon pa haña e derechi di marka na Kòrsou ta dor di hasi un depot. Un depot ta un aplikashon pa registrashon di un marka.

Kon pa registrá un marka
Ta yena un dokumentu special. E dokumentu aki ta disponibel den 4 idioma kualnan ta papiamentu, ingles, spañó of hulandes. Den e dokumentu aki ta menshoná:

• Nòmber I adrès di e depositante,
• E marka,
• Si e depositante ta deseá di menshoná e kolonan di e marka komo elementonan distintivo,un menshon di e kolo of kolonan aki.
• Si e marka ta un marka di forma, sea e forma di e empake of e forma di e produkto, menshon di ku e marka ta un marka den tres dimenshon,
• Menshon di e produktonan of servisionan pa kua e marka ta destiná,
• Si e marka ta un marka kolektivo, menshon di esaki,
• E firma di e depositante of su representante,
• Un deskripshon di e opheto pa kua e derechi eksklusivo ta keda apliká pe.

E ròl di e Ofisina pa Propiedat Intelektual
E ofisina ta e úniko instansia ofisial designá pa lei ku por registrá marka na Kòrsou. 

Ki derechi e doño di e marka ta haña dor di registrá su marka?
Dor di depositá I registrá e marka e doño di e marka ta haña e derechi eksklusivo pa uso di marka. Esaki ta enserá ku e doño di marka por oponé kualkier uso di e marka den transakshonnan ekonómiko pa e produkto i servisionan pa kual e marka ta registrá.
Despues di kompletá e formulario di registrashon i entrega esaki ta OPI bo por haña e protekshon pa e marka. Bo por ‘download’ e formulario aki for di nos website, yena esaki i entreg’é na OPI.

Nos ta rekomendábu pa bo yena e formulario ku lèternan di tik.

klik aki pa download e formularionan di marka